# Ynglingatal - **Verk:** Ynglingatal (verk:ynglingatal) - **Upphov:** Tillskrivs Þjóðólfr ór Hvini - **Datering:** 0850/1199 - **Källsamling:** Ynglingatal ur Ynglinga saga (heimskringla.no) - **Utgåva:** Citaten i Ynglinga saga efter N. Linder & H. A. Haggson (utg.), Heimskringla. Snorra Sturlusonar, Uppsala 1869–72. heimskringla.no. - **Språk:** non - **Typ:** original - **Licens:** Public domain ## citat 1 av 27 (Ynglinga saga kap. 14 hos Linder & Haggson = kap. 11 hos Olson) Varð framgengt, þar er Fróði bjó, feigðar orð, er at Fjölni kom: ok sikling Svigðis geira vágr vindlauss um viða skyldi. ## citat 2 av 27 (Ynglinga saga kap. 15 hos Linder & Haggson = kap. 12 hos Olson) En dagskjarr Durnis niðja salvörðuðr Svegði vélti, þá er í stein hinn stórgeði dulsa konr ept dvergi hljóp; ok sal bjartr þeirra Sökmímis jötunbygðr við jöfri gein. ## citat 3 av 27 (Ynglinga saga kap. 16 hos Linder & Haggson = kap. 13 hos Olson) En á vit Vilja bróður vitta vættr Vanlanda kom; þá tröllkund um troða skyldi liðs grímhildr ljóna bága; ok sá brann á beði Skútu menglötuðr, er mara kvaldi. ## citat 4 av 27 (Ynglinga saga kap. 17 hos Linder & Haggson = kap. 14 hos Olson) Ok Vísburs vilja byrði sjávar niðr svelgja knátti, þá er meinþjóf markar öttu setrverjendr á sinn föður; ok allvald í arinkjóli glóða garmr glymjandi beit. ## citat 5 av 27 (Ynglinga saga kap. 18 hos Linder & Haggson = kap. 15 hos Olson) Hitt var fyrr at fold ruðu sverðberendr sínum dróttni, ok landherr á lífs vanan dreyrug vápn Dómalda bar. Þá er árgjörn Jóta dólgi Svía kind um sóa skyldi. ## citat 6 av 27 (Ynglinga saga kap. 19 hos Linder & Haggson = kap. 16 hos Olson) Ok ek þess opt um Yngva hrör fróða menn um fregit hafða, hvar Dómarr á dynjanda bana Hálfs um borinn væri. Nú ek þat veit at verkbitinn Fjölnis niðr vit Fyri brann. ## citat 7 av 27 (Ynglinga saga kap. 20 hos Linder & Haggson = kap. 17 hos Olson) Kveðkat ek dul, nema Dyggva hrör Glitnis gná at gamni hefir; því at jóðís Úlfs ok Narfa konungamann kjósa skyldi; ok allvald Yngva þjóðar Loka mær um leikinn hefir. ## citat 8 av 27 (Ynglinga saga kap. 21 hos Linder & Haggson = kap. 18 hos Olson) Frá ek at Dagr dauða orði frægðar fúss, um fara skyldi, þá er valteins til Vörva kom spakfrömuðr spörs at hefna. Ok þat orð á Austrvega vísa ferð frá vígi bar, at þann gram um geta skyldi slönguþref Sleipnis verðar. ## citat 9 av 27 (Ynglinga saga kap. 22 hos Linder & Haggson = kap. 19 hos Olson) Þat tel ek undr, ef Agna her Skjálfar ráð at sköpum þóttu, þá er gœðing með gullmeni Loga dís at lopti hóf, hinn er vit Taur temja skyldi svalan hest Signýjar vers. ## citat 10 av 27 (Ynglinga saga kap. 23 hos Linder & Haggson = kap. 20 hos Olson) Féll Alrekr þar er Eiríki bróður vápn at bana urðu, ok hnakkmars höfuðfetlum Dags frændr um drepask kváðu. Fráat maðr áðr eykja gervi Freys afspring í fólk hafa. ## citat 11 av 27 (Ynglinga saga kap. 24 hos Linder & Haggson = kap. 21 hos Olson) Ok varð hinn, er Álfr um vá, vörðr véstalls um veginn liggja, er döglingr dreyrgan mæki öfundgjarn á Yngva rauð. Vara þat bært, at Bera skyldi valsœfendr vígs um hvetja, þá er brœðr tveir at bönum urðusk óþurfendr um ábrýði. ## citat 12 av 27 (Ynglinga saga kap. 28 hos Linder & Haggson = kap. 24 hos Olson) Varð Jörundr, hinn er endr um dó, lífs um lattr í Limafirði, þá er hábrjóstr hörva Sleipnir bana Guðlaugs um bera skyldi; ok Hagbarðs hersa valdi höðnu leif at hálsi gékk. ## citat 13 av 27 (Ynglinga saga kap. 29 hos Linder & Haggson = kap. 25 hos Olson) Knátti endr at Uppsölum Ánasótt Aun um standa; ok þrálífr þiggja skyldi jóðs aðal öðru sinni. Ok sveiðuðs at sér hverfði mækis hlut hinn mjóvara, er okhreins áttunga rjóðr lögðis odd liggjandi drakk. Máttit hárr mæki hjarðar austrkonungr upp um halda. ## citat 14 av 27 (Ynglinga saga kap. 30 hos Linder & Haggson = kap. 26 hos Olson) Ok lofsæll or landi fló Týs áttungr Tunna ríki. En flæming farra trjónu jötuns eykr á Agli rauð, sá er um austmörk áðr hafði brúna hörg um borit lengi. En skíðlauss skilfinga nið hœfis hjörr til hjarta stóð. ## citat 15 av 27 (Ynglinga saga kap. 31 hos Linder & Haggson = kap. 27 hos Olson) Féll Óttarr und ara greipar dugandligr fyrir Dana vápnum, þann hergammr hrægum fœti viti borinn á Vendli sparn. Þau frá ek verk Vötts ok Fasta sœnskri þjóð at sögum verða; at eylands jarlar Fróða vígframað um veginn höfðu. ## citat 16 av 27 (Ynglinga saga kap. 33 hos Linder & Haggson = kap. 29 hos Olson) Þat frá ek enn, at Aðils fjörvi vitta vettr um viða skyldi, ok dáðgjarn af drasils bógum Freys áttungr falla skyldi. Ok við aur œgir hjarna bragnings burs um blandinn varð; ok dáðsæll deyja skyldi Ála dólgr at Uppsölum. ## citat 17 av 27 (Ynglinga saga kap. 35 hos Linder & Haggson = kap. 31 hos Olson) Veit ek Eysteins enda fólginn lokins lífs á Lofundi; ok sikling með Svíum kváðu Jótska menn inni brenna. Ok bitsótt í brandnói hlíðar þangs á hilmi rann, þá er timbrfastr toptar nökkvi, flotna fullr um fylki brann. ## citat 18 av 27 (Ynglinga saga kap. 36 hos Linder & Haggson = kap. 32 hos Olson) Þat stökk upp, at Yngvari Sýslu kind um sóat hafði, ok ljóshömum við lagar hjarta her Eistneskr at hilmi vá, ok austmarr jöfri sœnskum Gýmis ljóð at gamni kveðr. ## citat 19 av 27 (Ynglinga saga kap. 39 hos Linder & Haggson = kap. 35 hos Olson) Varð Önundr Jónakrs bura harmi heptr und Himinfjöllum, ok ofvæg Eistra dólgi heipt hrísungs at hendi kom; ok sá frömuðr foldar beinum Högna hrörs um horfinn var. ## citat 20 av 27 (Ynglinga saga kap. 44 hos Linder & Haggson = kap. 40 hos Olson) Ok Ingjald í fjörvan trað reyks rösuðr á Ræningi, þá er húsþjófr hyrjar leistum goðkonung í gegnum steig. Ok sá urðr allri þjóðu sjaldgætastr með Svíum þótti, er hann sjálfr sínu fjörvi frœknu fyrstr um fara vildi. ## citat 21 av 27 (Ynglinga saga kap. 47 hos Linder & Haggson = kap. 43 hos Olson) Ok við vág, viðar (telgju) hræ Ólafs hofgyldir svalg, ok glóðfjálgr gervar leysti sonr Fornjóts af Svía jöfri. Sá áttkonr frá Uppsölum Lofða kyns fyrir löngu hvarf. ## citat 22 av 27 (Ynglinga saga kap. 49 hos Linder & Haggson = kap. 44 hos Olson) Þat frá hverr, at Hálfdanar sökmiðlendr sakna skyldu. Ok hallvarps hlífinauma þjóðkonung á Þótni tók. Ok Skæreið í Skíringssal of brynjálfs beinum drúpir. ## citat 23 av 27 (Ynglinga saga kap. 51 hos Linder & Haggson = kap. 46 hos Olson) En Eysteinn fyrir ási fór til Byleists bróður meyjar. Ok nú liggr und lagar beinum rekks löðuðr á raðar broddi, þar er élkaldr hjá jöfur gauzkum Vöðlu straumr at vági kemr. ## citat 24 av 27 (Ynglinga saga kap. 52 hos Linder & Haggson = kap. 47 hos Olson) Ok til þings Þriðja jöfri hveðrungs mær or heimi bauð, þá er Hálfdan, sá er á Holti bjó, norna dóms um notit hafði. Ok buðlung á Borrói sigrhafendr síðan fálu. ## citat 25 av 27 (Ynglinga saga kap. 53 hos Linder & Haggson = kap. 48 hos Olson) Varð Guðröðr hinn göfugláti lómi beittr sá er fyrir löngu var, ok umráð, at ölum stilli höfuð heiptrækt at hilmi dró. Ok launsigr hinn lómgeði Ásu árr af jöfri bar, ok buðlungr á beði fornum Stíflusunds um stunginn var. ## citat 26 av 27 (Ynglinga saga kap. 54 hos Linder & Haggson = kap. 49 hos Olson) Ok niðkvísl í Noregi þróttar Þrós um þróazk hafði. Réð Ólafr ofsa forðum víðri grund of Vestmari, unz fótverkr við foldar þröm vígmiðlung of viða skyldi. Nú liggr gunndjarfr á Geirstöðum herkonungr haugi ausinn. ## citat 27 av 27 (Ynglinga saga kap. 55 hos Linder & Haggson = kap. 50 hos Olson) Þat veit ek bazt und blám himni kenninafn svá at konungr eigi, er Rögnvaldr reiðar stjóri heiðum-hár of heitinn er.