# Ottars och Wulfstans berättelser (ur den fornengelska Orosius) > **Ogranskad:** Texten är avläst från sidbilder av en språkmodell och är ogranskad. Kontrollera mot sidbilden innan den citeras. - **Verk:** Ottars och Wulfstans berättelser (ur den fornengelska Orosius) (verk:ottar_wulfstan) - **Datering:** 0890/0899 - **Källsamling:** Ottar och Wulfstan ur den fornengelska Orosius (Sweet 1885, rensad OCR ur Internet Archive) - **Utgåva:** Henry Sweet (utg.), Extracts from Alfred's Orosius, Oxford 1885, avsnitt III–V (s. 10–19). Text rensad av språkmodell (Claude) ur Internet Archives OCR (extractsfromalfr00alfruoft), jämförd med Sweets EETS-utgåva 1883 (kingalfredsorosi79oros); noter och latinsk parallelltext borttagna. Ogranskad mot sidbild. - **Språk:** ang - **Typ:** maskintranskription - **Licens:** Public domain ## Sweet 1885, III Europe, s. 10–12, r. 1–10 Nu hæbbe we scortlice gesæd ymbe Asia londgemæro; nu wille we ymbe Europe londgemæro areccean swa micel swa we hit fyrmest witon. From þære ie Danais west oþ Rin þa ea, seo wilþ of þæm beorge þe mon Alpis hætt, ⁊ irnþ þonne norþryhte on þæs garsecges earm þe þæt lond uton ymbliþ þe mon Bryttania hætt; ⁊ eft suþ oþ Donua þa ea, þære æwielme is neah Rines ofre þære ie, ⁊ is siþþan east irnende wiþ norþan Creca lond ut on þone Wendelsæ; ⁊ norþ oþ þone garsecg þe mon Cwensæ hæt: binnan þæm sindon monega þeoda, ac hit mon hæt eall Germania. ## Sweet 1885, III Europe, s. 12–13, r. 11–50 Þonne wiþ norþan Donua æwielme ⁊ be eastan Rine sindon [Eastfrancan]; ⁊ be suþan him sindon Swæfas, on oþre healfe þære ie Donua. ⁊ be suþan him ⁊ be eastan sindon Bægware, se dæl þe mon Regnesburg hætt. ⁊ ryhte be eastan him sindon Bæme, ⁊ eastnorþ sindon Þyringa[s]. ⁊ be norþan him sindon Ealdseaxan, ⁊ be norþanwestan him sindon Frisan. Be westan Ealdseaxum is Ælfe muþa þære ie, ⁊ Frisland. ⁊ þonan westnorþ is þæt lond þe mon Ongle hæt, ⁊ Sillende, ⁊ sumne dæl Dene. ⁊ be norþan him is Afdrede, ⁊ eastnorþ Wilte, þe mon Hæfeldan hætt. ⁊ be eastan him is Wineda lond, þe mon hætt Sysyle, ⁊ eastsuþ, ofer sum dæl, Maroara. ⁊ hie Maroara habbaþ be westan him Þyringas, ⁊ Behemas, ⁊ Begware healfe; ⁊ be suþan him on oþre healfe Donua þære ie is þæt land Carendre suþ oþ þa beorgas þe mon Alpis hæt. To þæm ilcan beorgan licgaþ Begwara landgemæro ⁊ Swæfa. Þonne be eastan Carendran londe, [begeondan] þæm westenne, is Pulgara land. ⁊ be eastan þæm is Creca land. ⁊ be eastan Maroara londe is Wisle lond. ⁊ be eastan þæm sint Datia, þa þe iu wæron Gotan. Be norþaneastan Maroara sindon Dalamentsan ⁊ be eastan Dalamentsan sindon Horigti. ⁊ be norþan Dalamentsan sindon Surpe; ⁊ be westan him Sysyle. Be norþan Horoti is Mægþa land; ⁊ be norþan Mægþa londe Sermende oþ þa beorgas Riffen. Be westan Suþdenum is þæs garsecges earm þe liþ ymbutan þæt land Brettania; ⁊ be norþan him is þæs sæs earm þe mon hæt Ostsæ; ⁊ be eastan him ⁊ be norþan sindon Norþdene, ægþer ge on þæm maran landum ge on þæm iglandum; ⁊ be eastan him sindon Afdrede; ⁊ be suþan him is Ælfe muþa þære ie ⁊ Ealdseaxna sum dæl. Norþdene habbaþ be norþan him þone ilcan sæs earm þe mon hæt Ostsæ, ⁊ be eastan him sindon Osti þa leode; ⁊ Afrede be suþan. Osti habbaþ be norþan him þone ilcan sæs earm, ⁊ Winedas, ⁊ Burgendan; ⁊ be suþan him sindon Hæfeldan. Burgendan habbaþ þone [ylcan] sæs earm be westan him; ⁊ Sweon be norþan; ⁊ be eastan him sint Sermende, ⁊ be suþan him Surfe. Sweon habbaþ be suþan him þone sæs earm Osti; ⁊ be eastan him Sermende; ⁊ be norþan him ofer þa westenne is Cwenland; ⁊ be westannorþan him sindon [Scridefinnas]; ⁊ be westan Norþmenn. ## Sweet 1885, IV Ohthere's Voyage, s. 13, r. 1–6 Ohthere sæde his hlaforde, Ælfrede cyninge, þæt he ealra Norþmonna norþmest bude. He cwæþ þæt he bude on þæm lande norþweardum wiþ þa Westsæ. He sæde þeah [þæt] þæt land sie swiþe lang norþ þonan; ac hit is eal weste, buton on feawum stowum styccemælum wiciaþ Finnas, on huntoþe on wintra, ⁊ on sumera on fiscaþe be þære sæ. ## Sweet 1885, IV Ohthere's Voyage, s. 13–14, r. 7–31 He sæde þæt he æt sumum cirre wolde fandian hu longe þæt land norþryhte læge, oþþe hwæþer ænig mon be norþan þæm westenne bude. Þa for he norþryhte be þæm lande: let him ealne weg þæt weste land on þæt steorbord, ⁊ þa widsæ on þæt bæcbord þrie dagas. Þa wæs he swa feor norþ swa þa hwælhuntan firrest faraþ. Þa for he þagiet norþryhte swa feor swa he meahte on þæm oþrum þrim dagum gesiglan. Þa beag þæt land þær eastryhte, oþþe seo sæ in on þæt lond, he nysse hwæþer; buton he wisse þæt he þær bad westanwindes ⁊ hwon norþan, ⁊ siglde þa east be lande swa swa he meahte on feower dagum gesiglan. Þa sceolde he þær bidan ryhtnorþanwindes, for þæm þæt land beag þær suþryhte, oþþe seo sæ in on þæt land, he nysse hwæþer. Þa siglde he þonan suþryhte be lande swa he mehte on fif dagum gesiglan. Þa læg þær an micel ea up in on þæt land. Þa cirdon hie up in on þa ea, for þæm hie ne dorston forþ bi þære ea siglan for unfriþe; for þæm þæt land wæs eall gebun on oþre healfe þære eas. Ne mette he ær nan gebun land, siþþan he from his agnum hám fór. Ac him wæs ealne weg weste land on þæt steorbord, butan fiscerum ⁊ fugelerum ⁊ huntum, ⁊ þæt wæron eall Finnas; ⁊ him wæs a widsæ on þæt bæcbord. Þa Beormas hæfdon swiþe wel gebud hira land; ac hie ne dorston þær on cuman. Ac þara Terfinna land wæs eal weste buton þær huntan gewicodon, oþþe fisceras, oþþe fugeleras. ## Sweet 1885, IV Ohthere's Voyage, s. 14–15, r. 32–45 Fela spella him sædon þa Beormas ægþer ge of hiera agnum lande ge of þæm landum þe ymb hie utan wæron; ac he nyste hwæt þæs soþes wæs, for þæm he hit self ne geseah. Þa Finnas, him þuhte, ⁊ þa Beormas spræcon neah an geþeode. Swiþost he for þider, toeacan þæs landes sceawunge, for þæm horschwælum, for þæm hie habbaþ swiþe æþele ban on hiora toþum — þa teþ hie brohton sume þæm cyninge —, ⁊ hiora hyd biþ swiþe gód to scíprapum. Se hwæl biþ micle læssa þonne oþre hwalas: ne biþ he lengra þonne syfan elna lang. Ac on his agnum lande is se betsta hwælhuntaþ: þa beoþ eahta and feowertiges elna lange, ⁊ þa mæstan fiftiges elna lange. Þara he sæde þæt he syxa sum ofsloge syxtig on twam dagum. ## Sweet 1885, IV Ohthere's Voyage, s. 15, r. 46–61 He wæs swyþe spedig man on þæm æhtum þe heora speda on beoþ, þæt is, on wildrum. He hæfde þagyt, þa he þone cyningc sohte, tamra deora unbebohtra syx hund. Þa deor hi hataþ ‘hranas’; þara wæron syx stælhranas; þa beoþ swyþe dyre mid Finnum, for þæm hy foþ þa wildan hranas mid. He wæs mid þæm fyrstum mannum on þæm lande: næfde he þeah ma þonne twentig hryþera, ⁊ twentig sceapa, ⁊ twentig swyna; ⁊ þæt lytle þæt he erede he erede mid horsan. Ac hyra ár is mæst on þæm gafole þe þa Finnas him gyldaþ. Þæt gafol biþ on deora fellum, ⁊ on fugela feþerum, ⁊ hwales bane, ⁊ on þæm sciprapum, þe beoþ of hwæles hyde geworht, ⁊ of seoles. Æghwilc gylt be hys gebyrdum. Se byrdesta sceall gyldan fiftyne mearþes fell, ⁊ fif hranes, ⁊ an beran fel, ⁊ tyn ambra feþra, ⁊ berenne kyrtel oþþe yterenne, ⁊ twegen scíprapas; ægþer sy syxtig elna lang, oþer sy of hwæles hyde geworht, oþer of sioles. ## Sweet 1885, IV Ohthere's Voyage, s. 15, r. 62–74 He sæde þæt Norþmanna land wære swyþe lang ⁊ swyþe smæl. Eal þæt his man aþer oþþe ettan oþþe erian mæg þæt liþ wiþ þa sæ; ⁊ þæt is þeah on sumum stowum swyþe cludig; ⁊ licgaþ wilde moras wiþ eastan ⁊ wiþ uppon emnlange þæm bynum lande. On þæm morum eardiaþ Finnas. ⁊ þæt byne land is easteweard bradost, ⁊ symle swa norþor swa smælre. Eastewerd hit mæg bion syxtig mila brad, oþþe hwene brædre; ⁊ middeweard þritig oþþe bradre; ⁊ norþeweard, he cwæþ, þær hit smalost wære, þæt hit mihte beon þreora mila brad to þæm more; ⁊ se mór syþþan, on sumum stowum, swa brad swa man mæg on twam wucum oferferan; ⁊ on sumum stowum swa brad swa man mæg on syx dagum oferferan. ## Sweet 1885, IV Ohthere's Voyage, s. 15–16, r. 75–82 Þonne is toemnes þæm lande suþeweardum, on oþre healfe þæs mores, Sweoland, oþ þæt land norþeweard; ⁊ toemnes þæm lande norþeweardum Cwena land. Þa Cwenas hergiaþ hwilum on þa Norþmen ofer þone mor, hwilum þa Norþmen on hy. ⁊ þær sint swiþe micle meras fersce geond þa moras; ⁊ beraþ þa Cwenas hyra scypu ofer land on þa meras, ⁊ þanon hergiaþ on þa Norþmen; hy habbaþ swyþe lytle scypa ⁊ swyþe leohte. ## Sweet 1885, IV Ohthere's Voyage, s. 16, r. 83–95 Ohthere sæde þæt sio scir hatte Halgoland þe he on bude. He cwæþ þæt nan man ne bude be norþan him. Þonne is an port on suþeweardum þæm lande, þone man hæt Sciringes heal. Þyder he cwæþ þæt man mihte geseglian on anum monþe, gyf man on niht wicode, ⁊ ælce dæge hæfde ambyrne wind; ⁊ ealle þa hwile he sceal seglian be lande. ⁊ on þæt steorbord him biþ ærest Iraland, ⁊ þonne þa igland þe synd betux Iralande ⁊ þissum lande. Þonne is þis land oþ he cymþ to Scirincges heale, ⁊ ealne weg on þæt bæcbord Norþweg. Wiþ suþan þone Sciringes heal fylþ swyþe mycel sæ up in on þæt lond; seo is bradre þonne ænig man ofer seon mæge. ⁊ is Gotland on oþre healfe ongean, ⁊ siþþan Sillende. Seo sæ liþ mænig hund mila up in on þæt land. ## Sweet 1885, IV Ohthere's Voyage, s. 16, r. 96–105 ⁊ of Sciringes heale he cwæþ þæt he seglode on fif dagan to þæm porte þe mon hæt æt Hæþum; se stent betuh Winedum, ⁊ Seaxum, ⁊ Angle, ⁊ hyrþ in on Dene. Þa he þiderweard seglode fram Sciringes heale, þa wæs him on þæt bæcbord Denamearc, ⁊ on þæt steorbord widsæ þry dagas; ⁊ þa, twegen dagas ær he to Hæþum come, him wæs on þæt steorbord Gotland, ⁊ Sillende, ⁊ iglanda fela. On þæm landum eardodon Engle, ær hi hider on land coman. ⁊ hym wæs þa twegen dagas on þæt bæcbord þa igland þe in Denemearce hyraþ. ## Sweet 1885, V Wulfstan's Voyage, s. 17, r. 1–19 Wulfstan sæde þæt he gefore of Hæþum, þæt he wære on Truso on syfan dagum ⁊ nihtum, þæt þæt scip wæs ealne weg yrnende under segle. Weonoþland him wæs on steorbord, ⁊ on bæcbord him wæs Langaland, ⁊ Læland, ⁊ Falster, ⁊ Sconeg; ⁊ þas land eall hyraþ to Denemearcan. ⁊ þonne Burgenda land wæs us on bæcbord, ⁊ þa habbaþ him sylf cyning. Þonne æfter Burgenda lande wæron us þas land, þa synd hatene ærest Blecinga-ég, ⁊ Meore, ⁊ Eowland, ⁊ Gotland on bæcbord; ⁊ þas land hyraþ to Sweon. ⁊ Weonodland wæs us ealne weg on steorbord oþ Wislemuþan. Seo Wisle is swyþe mycel ea, ⁊ hio toliþ Witland ⁊ Weonodland; ⁊ þæt Witland belimpeþ to Estum; ⁊ seo Wisle liþ ut of Weonodlande, ⁊ liþ in Estmere; ⁊ se Estmere is huru fiftene mila brad. Þonne cymeþ Ilfing eastan in Estmere of þæm mere þe Truso standeþ in staþe, ⁊ cumaþ út samod in Estmere, Ilfing eastan of Eastlande, ⁊ Wisle suþan of Winodlande. ⁊ þonne benimþ Wisle Ilfing hire naman, ⁊ ligeþ of þæm mere west ⁊ norþ on sæ; for þy hit man hæt Wislemuþa. ## Sweet 1885, V Wulfstan's Voyage, s. 17–19, r. 20–60 Þæt Eastland is swyþe mycel, ⁊ þær biþ swyþe manig burh, ⁊ on ælcere byrig biþ cyningc. ⁊ þær biþ swyþe mycel hunig ⁊ fiscnaþ; ⁊ se cyning ⁊ þa ricostan men drincaþ myran meolc, ⁊ þa unspedigan ⁊ þa þéowan drincaþ medo. Þær biþ swyþe mycel gewinn betweonan him. ⁊ ne biþ þær nænig ealo gebrowen mid Estum, ac þær biþ médo genoh. ⁊ þær is mid Estum þeaw, þonne þær biþ man dead, þæt he liþ inne unforbærned mid his magum ⁊ freondum monaþ, ge hwilum twegen; ⁊ þa kyningas ⁊ þa oþre heahþungene men, swa micle lencg swa hi maran speda habbaþ, hwilum healf gear þæt hi beoþ unforbærned, ⁊ licgaþ bufan eorþan on hyra husum. ⁊ ealle þa hwile þe þæt lic biþ inne, þær sceal beon gedrync ⁊ plega, oþ þone dæg þe hi hine forbærnaþ. Þonne þy ylcan dæg [þe] hi hine to þæm ade beran wyllaþ, þonne todælaþ hi his feoh, þæt þær to lafe biþ æfter þæm gedrynce ⁊ þæm plegan, on fif oþþe syx, hwylum on ma, swa swa þæs feos andefn biþ. Alecgaþ hit þonne forhwæga on anre mile þone mæstan dæl fram þæm tune, þonne oþerne, þonne þæne þriddan, oþ þe hyt eall aled biþ on þære anre mile; ⁊ sceall beon se læsta dæl nyhst þæm tune þe se deada man on liþ. Þonne sceolon beon gesamnode ealle þa menn þe swyftoste hors habbaþ on þæm lande, forhwæga on fif milum oþþe on syx milum fram þæm feo. Þonne ærnaþ hy ealle toweard þæm feo; þonne cymeþ se man se þæt swiftoste hors hafaþ to þæm ærestan dæle ⁊ to þæm mæstan, ⁊ swa ælc æfter oþrum, oþ hit biþ eall genumen; ⁊ se nimþ þone læstan dæl se nyhst þæm tune þæt feoh geærneþ. ⁊ þonne rideþ ælc hys weges mid þan feo, ⁊ hyt motan habban eall; ⁊ for þy þær beoþ þa swiftan hors ungefoge dyre. ⁊ þonne hys gestreon beoþ þus eall aspended, þonne byrþ man hine út, ⁊ forbærneþ mid his wæpnum ⁊ hrægle. ⁊ swiþost ealle hys speda hy forspendaþ mid þan langan legere þæs deadan mannes inne, ⁊ þæs þe hy be þæm wegum alecgaþ, þe þa fremdan to ærnaþ, ⁊ nimaþ. ⁊ þæt is mid Estum þeaw þæt þær sceal ælces geþeodes man beon forbærned; ⁊ gyf þar man an ban findeþ unforbærned, hi hit sceolan miclum gebetan. ⁊ þær is mid Eastum an mægþ þæt hi magon cyle gewyrcan; ⁊ þy þær licgaþ þa deadan men swa lange ⁊ ne fuliaþ, þæt hy wyrcaþ þone cyle him on. ⁊ þeah man asette twegen fætels full ealaþ oþþe wæteres, hy gedoþ þæt ægþer biþ oferfroren, sam hit sy sumor sam winter.