# Finnsburgfragmentet

- **Verk:** Finnsburgfragmentet (verk:finnsburg)
- **Källsamling:** Beowulf och Finnsburgfragmentet (Harrison & Sharp 1894; Wickberg 1914)
- **Utgåva:** James A. Harrison & Robert Sharp (utg.), Bēowulf: an Anglo-Saxon poem, 4 uppl., Boston 1894, appendix. Project Gutenberg #9701.
- **Språk:** ang
- **Typ:** original
- **Licens:** Public domain

## rad 1–48

<!-- passage: finnsburg:rad:1- -->

". . . . . . . . . . . næs byrnað nǣfre."
Hleoðrode þā   heaðo-geong cyning:
"Ne þis ne dagað ēastan,   ne hēr draca ne flēogeð,
"ne hēr þisse healle   hornas ne byrnað,
"ac fēr forð berað   fugelas singað,
"gylleð grǣg-hama,   gūð-wudu hlynneð,
"scyld scefte oncwyð.   Nū scȳneð þes mōna
"waðol under wolcnum;   nū ārīsað wēa-dǣda,
"þē þisne folces nīð   fremman willað.
"Ac onwacnigeað nū,   wīgend mīne,
"hebbað ēowre handa,   hicgeað on ellen,
"winnað on orde,   wesað on mōde!"
Þā ārās monig gold-hladen þegn,   gyrde hine his swurde;
þā tō dura ēodon   drihtlīce cempan,
Sigeferð and Eaha,   hyra sweord getugon,
and æt ōðrum durum   Ordlāf and Gūðlāf,
and Hengest sylf;   hwearf him on lāste.
Þā gīt Gārulf   Gūðere styrode,
þæt hīe swā frēolīc feorh   forman sīðe
tō þǣre healle durum   hyrsta ne bǣran,
nū hyt nīða heard   ānyman wolde:
ac hē frægn ofer eal   undearninga,
dēor-mōd hæleð,   hwā þā duru hēolde.
"Sigeferð is mīn nama (cwæð hē),   ic eom Secgena lēod,
"wrecca wīde cūð.   Fela ic wēana gebād,
"heardra hilda;   þē is gȳt hēr witod,
"swæðer þū sylf tō mē   sēcean wylle."
Þā wæs on wealle   wæl-slihta gehlyn,
sceolde cēlod bord   cēnum on handa
bān-helm berstan.   Buruh-þelu dynede,
oð þæt æt þǣre gūðe   Gārulf gecrang,
ealra ǣrest   eorð-būendra,
Gūðlāfes sunu;   ymbe hine gōdra fela.
Hwearf flacra hrǣw   hræfn, wandrode
sweart and sealo-brūn;   swurd-lēoma stōd
swylce eal Finns-buruh   fȳrenu wǣre.
Ne gefrægn ic nǣfre wurðlīcor   æt wera hilde
sixtig sige-beorna   sēl gebǣran,
ne nǣfre swānas swētne   medo sēl forgyldan,
þonne Hnæfe guldon   his hæg-stealdas.
Hig fuhton fīf dagas,   swā hyra nān ne fēol
driht-gesīða,   ac hig þā duru hēoldon.
Þā gewāt him wund hæleð   on wæg gangan,
sǣde þæt his byrne   ābrocen wǣre,
here-sceorpum hrōr,   and ēac wæs his helm þyrl.
Þā hine sōna frægn   folces hyrde,
hū þā wīgend   hyra wunda genǣson
oððe hwæðer þǣra hyssa . . . . . . .