# Grímnismál

- **Verk:** Grímnismál (verk:edda:grimnismal)
- **Källsamling:** Den poetiska Eddan (Finnur Jónsson 1932; Brate 1913)
- **Utgåva:** Finnur Jónsson (utg.), De gamle Eddadigte, København 1932: Grímnismǫ́l. heimskringla.no.
- **Språk:** non
- **Typ:** original
- **Licens:** Public domain

## Grímnismál (Finnur Jónsson 1932)

<!-- passage: edda:grimnismal:non -->

Grímnismǫ́l 
 1. 
 Hęitr est hripuðr 
 ok hęldr til mikill, 
 gǫngumk firr funi; 
 loði sviðnar, 
 þótt á lopt berak; 
 brinnumk feldr fyrir. * 
 2. 
 Átta nætr satk * 
 milli ęlda hér, * 
 svát mér mangi * 
 mat né bauð * 
 nema ęinn Agnarr, * 
 es ęinn skal ráða, * 
 Geirrøðar sonr, * 
 Gotna landi. * 
 3. 
 Hęill skalt, Agnarr, 
 alls hęilan biðr 
 þik Veratýr vesa; 
 ęins drykkjar 
 þú skalt aldrigi 
 bętri gjǫld geta. 
 4. 
 Land ’s hęilagt, 
 es liggja sék 
 ǫ́sum ok ǫlfum nær; 
 ęn í Þrúðhęimi * 
 skal Þórr vesa * 
 unz of rjúfask ręgin. * 
 5. 
 Ýdalir hęita, 
 þars Ullr of hęfr 
 sér of gǫrva sali; 
 Alfhęim Fręy 
 gǫ́fu í árdaga 
 tívar at tannféi. 
 6. 
 Bœr ’s hinn þriði, 
 es blíð ręgin 
 silfri þǫkðu sali; 
 Valaskjǫlf hęitir, 
 es vélti sér 
 ǫ́ss í árdaga. 
 7. 
 Søkkvabękkr hęitir (hinn fjórði), 
 ęn þar svalar knegu 
 unnir glymja yfir; 
 þar þau Óðinn ok Sága 
 drekka of alla daga 
 glǫð ór gollnum kęrum. 
 8. 
 Glaðshęimr hęitir (hinn fimti) 
 þars hin gollbjarta 
 Valhǫll víð of þrumir; 
 ęn þar Hroptr 
 kýss hvęrjan dag 
 vápndauða vera. 
 9. 
 Mjǫk ’s auðkęnt 
 þęims til Óðins koma 
 salkynni at séa, 
 skǫptum ’s rann rępt, 
 skjǫldum ’s salr þakiðr, 
 brynjum of bękki stráat. 
 10. 
 Mjǫk ’s auðkęnt 
 þęims til Óðins koma 
 salkynni at séa, 
 vargr hangir 
 fyr vestan dyrr 
 ok drúpir ǫrn yfir. 
 11. 
 Þrymhęimr hęitir (hinn sétti), * 
 es Þjazi bjó, * 
 sá hinn ámátki jǫtunn; * 
 ęn nú Skaði byggvir, * 
 skír brúðr goða, * 
 fornar toptir fǫður. * 
 12. 
 Bręiðablik eru (hin sjaundu), * 
 ęn þar Baldr hęfir * 
 sér of gǫrva sali, * 
 á því landi * 
 es liggja vęitk * 
 fæsta fęiknstafi. * 
 13. 
 Himinbjǫrg eru (hin ǫ́ttu), * 
 ęn Hęimdall þar * 
 kveða valda véum, * 
 þar vǫrðr goða * 
 drekkr í væru ranni * 
 glaðr hinn góða mjǫð. * 
 14. 
 Folkvangr es (hinn níundi), * 
 ęn þar Fręyja ræðr * 
 sessa kostum í sal; * 
 halfan val* 
 hón kýss hvęrjan dag, * 
 en halfan Óðinn á. * 
 15. 
 Glitnir es (hinn tíundi), * 
 hann ’s golli studdr * 
 ok silfri þakðr hit sama, * 
 ęn þar Forseti * 
 byggvir flęstan dag * 
 ok svæfir allar sakar. * 
 16. 
 Nóatún eru (hin elliptu), * 
 ęn þar Njǫrðr hęfir * 
 sér of gǫrva sali; * 
 manna Þęngill * 
 hinn męins vani * 
 hótimbruðum hǫrgi ræðr. * 
 17. 
 Hrísi vex * 
 ok hóu grasi * 
 Víðars land Viði, * 
 ęn þar mǫgr of læzk * 
 af mars baki * 
 frœkn at hęfna fǫður. * 
 18. 
 Andhrímnir 
 lætr í Ęldhrímni 
 Sæhrímni soðinn, 
 flęska bazt, 
 en þat fáir vitu, 
 við hvat Ęinhęrjar alask. 
 19. 
 Gera ok Freka 
 sęðr gunntamiðr 
 hróðigr Hęrjafǫðr, 
 ęn við vín ęitt 
 vápngǫfugr 
 Óðinn æ lifir. 
 20. 
 Huginn ok Muninn 
 fljúga hvęrjan dag 
 jǫrmungrund yfir; 
 óumk of Hugin, 
 at aptr né komit; 
 þó séumk męir of Munin. 
 21. 
 Þýtr Þund, 
 unir Þjóðvitnis 
 fiskr flóði í; 
 áarstraumr 
 þykkir ofmikill 
 valglaumi at vaða. 
 22. 
 Valgrind hęitir, 
 es stęndr vęlli á 
 heilǫg fyr hęlgum durum; 
 forn ’s sú grind, 
 ęn þat fáir vitu, 
 hvé hon ’s í lás of lokin. 
 23. 
 Fimm hundruð dura 
 ok umb fjórum tøgum, 
 svá hygg á Valhǫllu vesa; 
 átta hundruð (Ęinhęrja) 
 ganga ór ęinum durum, 
 þás fara við vitni at vega. 
 24. 
 Fimm hundruð golfa * 
 ok umb fjórum tøgum* 
 svá hygg Bilskirni með bugum; * 
 ranna þęira, * 
 es rępt vitak, * 
 míns vęitk męst magar. * 
 25. 
 Hęiðrún hęitir (gęit), 
 es stęndr hǫllu á 
 ok bítr af Læraðs limum; 
 skapkęr fylla 
 hon skal hins skíra mjaðar, 
 knáat sú vęig vanask. 
 26. 
 Ęikþyrnir hęitir (hjǫrtr), 
 es stęndr hǫllu á 
 ok bítr af Læraðs limum, 
 ęn af hans hornum 
 drýpr í Hvergęlmi, 
 þaðan ęigu vǫtn ǫll vega. 
 27. 
 Síð ok Víð, * 
 Sœkin ok Ęikin, * 
 Svǫl ok Gunnþró, * 
 Fjǫrm ok Fimbulþul, * 
 (Rín ok Rennandi) * 
 Gipul ok Gǫpul, * 
 Gǫmul ok Gęirvimul, * 
 þær hverfa of hodd goða. * 
 28. 
 Þyn ok Vin, * 
 Þǫll ok Hǫll, * 
 Grǫð ok Gunnþorin, * 
 Vína hęitir ęnn, * 
 ǫnnur Vegsvinn, * 
 þriðja Þjóðnuma. — * 
 29. 
 Nyt ok Nǫt, * 
 Nǫnn ok Hrǫnn, * 
 Slíð ok Hríð, * 
 Sylgr ok Ylgr, * 
 Víð ok Vǫ́n, * 
 Vǫnd ok Strǫnd, * 
 Gjǫll ok Lęiptr, * 
 falla gumnum nær * 
 (ęn falla til Hęljar heðan). — * 
 30. 
 Kǫrmt ok Ǫrmt * 
 ok Kerlaugar tvær, * 
 þær skal Þórr vaða * 
 dag hvęrjan, * 
 es hann dœma fęrr * 
 at aski Yggdrasils. * 
 (Þvíat ásbrú * 
 brinnr ǫll loga, * 
 heilǫg vǫtn hlóa). * 
 31. 
 Glaðr ok Gyllir, * 
 Glær ok Skeiðbrimir, * 
 Silfrintoppr ok Sinir, * 
 Gísl ok Falhófnir, * 
 Gulltoppr ok Léttfeti, * 
 þeim ríða æsir jóum. * 
 (dag hvęrn, * 
 es þęir dœma fara * 
 at aski Yggdrasils). — * 
 32. 
 Þríar rœtr * 
 standa á þría vega * 
 undan aski Yggdrasils; * 
 Hęl býr und ęinni, * 
 annarri hrímþursar, * 
 þriðju męnskir męnn. — * 
 33. 
 Ratatoskr hęitir (íkorni), * 
 es rinna skal * 
 at aski Yggdrasils, * 
 arnar orð * 
 hann skal ofan bera * 
 ok segja Níðhǫggvi niðr. — * 
 34. 
 Hirtir eru ok fjórir, * 
 þęirs af hæfingar * 
 gaghalsir gnaga; * 
 Dáinn ok Dvalinn, * 
 Dunęyrr ok Duraþrór. — * 
 35. 
 Ormar flęiri* 
 liggja und aski Yggdrasils, * 
 an þat of hyggi hvęrr (ósviðra apa), * 
 Góinn ok Móinn * 
 eru Grafvitnis synir * 
 (Grábakr ok Grafvǫlluðr) * 
 Ófnir ok Sváfnir * 
 hygg at æ skyli * 
 męiðs kvistu máa. — * 
 36. 
 Askr Yggdrasils * 
 drýgir ęrfiði * 
 męira an męnn viti, * 
 hjǫrtr bítr ofan, * 
 ęn á hliðu fúnar, * 
 skęrðir Níðhǫggr neðan. — * 
 37. 
 Hrist ok Mist 
 vilk at mér horn beri, 
 Skęggjǫld ok Skǫgul, 
 Hildr ok Þrúðr, * 
 Hlǫkk ok Hęrfjǫtur, * 
 Gǫll ok Gęirǫnul * 
 Randgríðr ok Ráðgríðr 
 ok Ręginlęif, 
 þær bera Ęinhęrjum ǫl. 
 38. 
 Árvakr ok Alsviðr * 
 skulu upp heðan * 
 svangir sól draga, * 
 ęn und þęira bógum * 
 fǫ́lu blíð ręgin * 
 æsir ísarnkol. * 
 39. 
 Svalinn hęitir, * 
 hann stęndr sólu fyrir, * 
 skjǫldr skínanda goði; * 
 bjǫrg ok brim * 
 vęitk at brinna skulu, * 
 ef hann fęllr í frá. * 
 40. 
 Skoll hęitir ulfr, * 
 es fylgir hinu skírlęita * 
 goði til varna viðar, * 
 ęn annarr Hati, * 
 hann ’s Hróðvitnis sonr, * 
 sá skal fyr hęiða brúði himins. * 
 41. 
 Ór Ymis holdi * 
 vas jǫrð of skǫpuð, * 
 ęn ór svęita sær, * 
 bjǫrg ór bęinum, * 
 baðmr ór hári, * 
 ęn ór hausi himinn. * 
 42. 
 En ór hans brǫ́um * 
 gęrðu blíð ręgin * 
 Miðgarð manna sonum, * 
 ęn ór hans hęila * 
 vǫ́ru þau hin harðmóðgu * 
 ský ǫll of skǫpuð. — * 
 43. 
 Ullar hylli 
 hęfr ok allra goða 
 hvęrr ’s tękr fyrstr á funa, 
 opnir hęimar 
 verða of ása sonum, 
 þás hęfja af hvera. 
 44. 
 Ívalda synir * 
 gingu í árdaga * 
 Skíðblaðni at skapa, * 
 skipa bazt * 
 skírum Fręy, * 
 nýtum Njarðar bur. — * 
 45. 
 Askr Yggdrasils, * 
 hann ’s œztr viða, * 
 ęn Skíðblaðnir skipa, * 
 Óðinn ása, * 
 ęn jóa Slęipnir, * 
 Bilrǫst brúa. * 
 (ęn Bragi skalda, * 
 Hábrók hauka, * 
 ęn hunda Garmr). * 
 46. 
 Svipum hęfk nú ypt 
 fyr sigtíva sonum, 
 við þat skal vilbjǫrg vaka, 
 ǫllum ǫ́sum 
 þat skal inn koma 
 Ægis bękki á 
 (Ægis drekku at). 
 47. 
 Hétumk Grímr, 
 hétumk Gangleri, 
 Hęrjan ok Hjalmberi, 
 Þękkr ok Þriði, 
 Þundr ok Uðr, 
 Hęrblindi ok Hóarr. 
 48. 
 Saðr ok Svipall 
 ok Sanngetall, 
 Hęrtęitr ok Hnikarr, 
 Bilęygr, Bálęygr, * 
 Bǫlverkr, Fjǫlnir, * 
 Grímr ok Grímnir, * 
 Glapsviðr ok Fjǫlsviðr, * 
 Síðhǫttr, Síðskęggr, * 
 Sigfǫðr, Hnikuðr, * 
 Alfǫðr, Valfǫðr, * 
 Atríðr ok Farmatýr * 
 ęinu nafni * 
 hétumk aldrigi, * 
 síz með folkum fórk. * 
 49. 
 Grímni mik hétu * 
 at Geirrøðar, * 
 ęn Jalk at Ásmundar, * 
 ęn þá Kjalar, * 
 es kjalka drók, * 
 Þrór þingum at. * 
 (Óski ok Ómi, * 
 Jafnhár ok Biflindi, * 
 Gǫndlir ok Hárbarðr með goðum). * 
 50. 
 Sviðurr ok Sviðrir 
 hétk at Sǫkkmímis, 
 ok dulðak hinn aldna jǫtun, 
 þás Miðvitnis 
 vask hins mæra burar 
 orðinn ęinbani. 
 51. 
 Ǫlr est Geirrøðr, 
 hefr þú of drukkit 
 — — — — 
 miklu est hnugginn, 
 es þú est mínu gęngi, 
 allra Ęinherja ok Óðins. 
 52. 
 Fjǫlð þér sagðak, 
 ęn þú fátt of mant, 
 of þik véla vinir; 
 mæki liggja 
 sék míns vinar 
 allan í dręyra drifinn. 
 53. 
 Ęggmóðan val 
 nú mun Yggr hafa, 
 þitt vęitk líf of liðit; 
 úfar ro dísir, 
 nú knátt Óðin séa; 
 nálgask mik ef þú męgir. 
 54. 
 Óðinn nú hęitik, * 
 Yggr áðan hétk, * 
 hétumk Þundr fyr þat, * 
 (Vakr ok Skilfingr, * 
 Vǫ́fuðr ok Hroptatýr * 
 Gautr ok Jalkr með goðum) * 
 Ófnir ok Sváfnir * 
 hygg at orðnir sé * 
 allir at ęinum mér. *