# Baldrs draumar

- **Verk:** Baldrs draumar (verk:edda:baldrs_draumar)
- **Källsamling:** Den poetiska Eddan (Finnur Jónsson 1932; Brate 1913)
- **Utgåva:** Finnur Jónsson (utg.), De gamle Eddadigte, København 1932: Baldrs draumar (FJ). heimskringla.no.
- **Språk:** non
- **Typ:** original
- **Licens:** Public domain

## Baldrs draumar (Finnur Jónsson 1932)

<!-- passage: edda:baldrs_draumar:non -->

1.
 Sęnn vǫ́ru æsir
 allir á þingi
 ok ǫ́synjur
 allar á máli,
 ok of þat réðu
 ríkir tívar,
 hví væri Baldri
 ballir draumar.
 2.
 Upp reis Óðinn,
 aldinn gautr,
 ok hann á Slęipni
 sǫðul of lagði,
 ręið niðr þaðan
 niflhęljar til;
 mœtti hvelpi,
 þęims ór hęlju kom.
 3.
 Sá vas blóðugr
 of brjóst framan,
 ok galdrs fǫður
 gól oflęngi,
 framm ręið Óðinn,
 foldvegr dunði,
 hann kom at hóu
 Hęljar ranni.
 4.
 Þá ręið Óðinn
 fyr austan dyrr,
 þars hann vǫlu
 vissi lęiði;
 nam hann vittugri
 valgaldr kveða,
 unz nauðug ręis,
 nás orð of kvað:
 5.
 Hvat ’s manna þat
 mér ókunnra,
 es mér hęfr aukit
 ęrfitt sinni;
 vask snivin snævi,
 ok slęgin regni
 ok drifin dǫggu,
 dauð vask lęngi.
 Ó. kv. 6.
 Vegtamr hęitik,
 emk Valtams sonr,
 sęg mér ór hęlju,
 ek ór hęimi mun,
 hvęim eru bękkir
 baugum sánir?
 flęt fagrliga
 flóuð eru golli.
 7.
 Hér stęndr Baldri
 of brugginn mjǫðr,
 skírar vęigar,
 liggr skjǫldr yfir,
 ęn ásmęgir
 í ofvæni;
 nauðug sagðak,
 nú munk þęgja.
 Ó. kv. 8.
 Þęgjat vǫlva,
 þik vilk fregna,
 unz ’s alkunna,
 vilk ęnn vita,
 hvęrr mun Baldri
 at bana verða,
 ok Óðins son
 aldri ræna?
 9.
 Hǫðr berr hóvan
 hróðrbaðm þinig,
 hann mun Baldri
 at bana verða,
 ok Óðins son
 aldri ræna;
 nauðug sagðak,
 nú munk þęgja.
 Ó. kv. 10.
 Þęgjat vǫlva,
 þik vilk fregna,
 unz ’s alkunna,
 vilk ęnn vita,
 hvęrr mun hęipt Hęði
 hęfnt of vinna,
 eða Baldrs bana
 á bál vega?
 11.
 Rindr berr Vála
 í vestrsǫlum,
 sá mun Óðins sonr *
 einnættr vega, *
 hǫnd of þværat
 né hǫfuð kęmbir,
 áðr á bál of berr
 Baldrs andskota;
 nauðug sagðak,
 nú munk þęgja.
 Ó. kv. 12.
 Þęgjat vǫlva,
 þik vilk fregna,
 unz ’s alkunna,
 vilk ęnn vita,
 hvęrjar ro męyjar,
 es at muni gráta
 ok á himin verpa
 halsaskautum?
 13.
 Estat Vegtamr,
 sem ek hugða,
 hęldr est Óðinn,
 aldinn gautr.
 Ó. kv.
 Estat vǫlva
 né vís kona,
 hęldr est þriggja
 þursa móðir.
 14.
 Hęim ríð Óðinn
 ok hróðigr ves,
 svá komið manna
 męirr aptr á vit,
 es lauss Loki
 líðr ór bǫndum
 ok ragna rǫk
 rjúfęndr koma.